B - 7個月的嵐嵐

嵐嵐開始左加固都差唔多個半月
呢個月好似無咩進展
唔知係咪日日都食三色椒蘿蔔露荀食到悶..
唯有諗下啲新野比佢食
早餐食香蕉pancake


開始試飯波

不過就咁圓形既飯波
嵐嵐捏到爛晒食到周圍都係
然後又試加紫菜
我要慢慢拿捏下啲米要落幾多水..


雖然嵐嵐代到一餐
平日都好少代餐
自己唔係全日同佢一齊
好難要求照顧者跟足自己果套
姐姐都仲話可以點佢做野
自己媽咪同奶奶就好難
始終佢地有自己果套
花左啲時間解釋比我媽聽叫佢唔好餵
BB可以自己食
見佢終於肯放手比BB自己食
放心比佢中午代一餐
但係奶奶嫌污糟唔比BB用手自己食
睇黎都仲要啲時間.........

有個星期日楊生要番工
佢車左我地去廸欣湖度玩
嵐嵐真係好大膽
玩鞦韆一啲都唔驚
仲越高越開心


放假既朝早最鐘意同嵐嵐玩自拍

今個月既milestone係嗌BABAMAMA同自己企

嗌BABAMAMA係12月頭無啦啦有朝訓醒
佢響床度係咁MAMAMAMA
其實自從9月開始嵐嵐忽然間講少左野
但係由佢無啦啦MAMAMAMA之後就成日都講
嵐嵐無偏心
識講MAMA既同一日下午講埋BABA~
而家一路玩一路BABABABA
一路喊一路MAMAMAMA =_=

到有一日放佢響床仔度坐
佢自己撳住床邊企左響度
好西利呀你~!
咁你張床又要較低啲喇 XD


7個月快樂

B - 嵐嵐第一遊(台北)

聖誕節帶左嵐嵐去旅行

呢張機票響嵐嵐未出世既時候已經換左

近近地揀左去台北小試牛刀

幫BB拎埋PASSPORT就打左上AM買BB飛

**第一天 (23/12)**

我地搭9點幾機

朝早6點半出門口搭巴士去機場

checkin完諗住入lounge

點知近gate1果個好多人

拿拿聲去近gate60果個

食個魚蛋米同腸粉後又匆匆忙忙行番去gate27上機

order左BB餐

係HEINZ既果蓉

嵐嵐第一次食果蓉

好似好難食咁 XD

嵐嵐大致上成程機都好乖

一上機埋身食奶

然後訓左陣就食果蓉

玩一陣又落機~

帶住BB可以坐第一排

好闊落呀

不過由於朝早太早起身

去到桃園機場排隊入境既時候就昏迷左

午餐約左朋友仔食飯

食飽就去左大安森林公園呼吸新鮮空氣~

夜晚去左饒河夜市食食食食

夜晚去左酒店附近的supermarket買定啲三色椒黎緊三日比bb食

**第二天 (24/12)**

酒店有網床同浴盆提供(比左500台幣)

我地自己帶左床單(好彩帶左，佢張床單好污糟)同埋BB枕頭仔布公仔

尋晚放左嵐嵐落床講完早抖後熄燈

佢自己碌碌下訓左

仲訓到第二朝7點

估唔到佢 無訓唔慣喎

叻女>3<

晏晝諗住去食肥前屋

12點去到好多人

去左附近食燒肉放題

然後去左台北地下街買雪糕
發現用紙撥bb佢會笑得好開心

一路行行行去到西門町食阿宗麵線

然後就去板橋買所長茶葉蛋~

**第三天 (25/12)**

聖誕節梗要著聖誕裝

今日去台北動物園

沿路都好多人話bb"巧可愛哦~"

參觀動物園後番左酒店放低bb車去通化夜市

然後就行左過市政府果邊既新光三越食crepe

**第四天 (26/12)**

最後一日既行程係去番肥前屋食鰻魚飯

我地未到11點就去到

梗係唔使等位啦

諗住去家樂福買啲兒童書

點知小南門果間得好少.....

咁就唯有下次再搵啦

去到桃園機場checkin

推住bb車有特快通道

1點7到機場

唔使2點就入到去

梗係去lounge食下野先

點知plaza premium無魯肉飯

得喇沙..

唯有食住先喇

飛機上面得雞卷咋

checkin既時候地勤幫我地調左坐前排

又有得提前上機

帶住嵐嵐真係好多優待 XD

回程嵐嵐都係食奶..食果蓉..玩..

然後到香港lu

**小結**

今次旅行帶住嵐嵐

唔可以好自在咁周圍去

要睇住時間食奶

我地食野果陣佢無得食又會嘈..

不過好處係嵐嵐埋身食

唔使帶奶樽奶粉出街又唔使洗

但係我都有帶個泵同奶樽去

我半夜無再起身泵奶

而係朝早埋身後再泵清

番到香港暫見奶量無少到

未出發去台北已經買左4月尾去首爾

楊生話可以2個月去一次台灣快閃XD

正*v*

B - 6個月的嵐嵐

嵐嵐半歲喇
呢個亦都係我第一個check point 😄
當初以為餵人奶好簡單
原來係要付出咁多
啲人問我打算餵到幾時
um.. 餵到佢唔食囉 😆

嵐嵐5個幾月既時候已經坐得好穩
心急既我就比佢開始BLW加固
睇住佢食野真係好開心



出街都無阻嵐嵐食野

到而家嵐嵐食過菜芯、蕃薯、蕉、燈籠椒、南瓜、節瓜、蘿蔔、螺絲粉
又要諗下有咩新野比佢試
一個為食既小朋友係乜野拎上手都會放入口試
唔好似媽媽揀飲擇食😝

響呢個月我地都發現到BB有一隻牙仔冒緊出黎

我真係驚你有牙呀😳

佢試過咬我
我打左佢一下然後就爆喊
再試再咬
呢次無打齋鬧
佢都爆喊
來回左兩三次佢就唔敢埋身..
好驚佢從此以後唔埋身食
好彩到下餐佢無嬲照食姐✌

半歲快樂!!

B - 5個月的嵐嵐

每年既呢個月我比較繁忙(難得地)
就係因為咁就泵少左奶
全日大約少左10-20%
嚇到我即係半夜powerpump
雖然要搞成個幾鐘好眼訓
但係為左嵐嵐咩都抵~
好好彩只係powerpump左幾日奶量就番番黎喇

其實而家日頭泵連埋身滴既奶都夠食
而且嵐嵐戒左夜奶同埋好多時半夜唔再起身
不過我都係會較鬧鐘3:30-4:30起身泵奶
每次都泵到10-15安
呢一泵既奶通常都係做冰奶
之前曾經講過嵐嵐戒夜奶就半夜唔泵
老公見我要半夜起身咁辛苦都叫我唔好泵
但係又驚會少左奶唔夠食
所以每日無論幾眼訓都會起身泵奶
暫時講住嵐嵐加固就唔泵半夜啦 (講住先~)

好幸運嵐嵐無nipple confusion
每論埋身定食樽都食得幾好
之前成日聽人講話用左樽會唔肯埋身
好彩我地兩個都仲係好enjoy埋身呢個moment (至少我好鐘意)
一抱埋身放好位嵐嵐就會擰頭mark大口~
甩左咀仲會笑添 =)


嵐嵐開始會伸手要人抱
放工番到屋企佢就會笑然後伸手想抱
我地就拿拿聲洗乾淨手就抱個寶貝

而定嵐嵐好鐘意去街
知道換好衫開門就知有街去
抱住佢就會撐手撐腳
跟住就好乖咁坐住BB車
好搞笑呀你嵐嵐


有時我地都會揹住佢
唔使推住架車

為左滿足鐘意啜手指既嵐嵐
我地買左隻膠手指比佢
但係佢都係鐘意食自己果隻多啲


5個月快樂呀嵐嵐

B - 4個月的嵐嵐

嵐嵐已經介左成個月無飲夜奶
呢個月都係半夜會郁會醒
但係塞個奶咀比佢就好快訓番
朝早差唔多6點就起身..
我地放假都係=.=
但係佢起身通常都係自己玩下講下野
大概半個鐘左右先會搵人

呢個月其中一個里程碑就係轉身!
嵐嵐響3個半月左右學識自己轉身
再過多幾日就已經可以好自如咁樣轉
無論幾擠逼既地方都阻止唔到佢
有時扒到攰會嗌救命
幫佢反番轉之後佢又會自己再轉
然後又嗌救命........
最怕佢飲完奶轉身
嘔到成地都係~


另外而家嵐嵐十分鐘意食手
亦都鐘意放野入口
包括試下個波波


響GMARKET買多左張新地墊長期放地下
嵐嵐好鐘意


之前好擔心姐姐
而家好似已經融入家中
佢都算聽話
亦都好錫嵐嵐(重點)
除左係鐘意玩電話
不過佢都好守規矩
講明幾時唔玩得佢都無玩

肥妹仔去健康院磅重
成功上左去90%體重生長線!
歸功於3餐250ML奶+2餐埋身

B - 3個月的嵐嵐

唔經唔覺嵐嵐已經3個月喇

之前一直糾纏介夜奶既問題
終於響滿3個月前2日第一次一覺訓天光 =D
不過好可惜暫時之係試過一次~
但係經過今次我地就知道原來半夜嵐嵐可以唔使食奶
我地就嘗試唔比奶佢飲就咁暗番佢訓
暫時呢樣都成功
3點幾醒左暗一陣就再訓到天光
下一步就係介半夜醒喇

而我都已經番左一個月工
生活都變番正常
每日就係朝早6點9埋身
通常嵐嵐都係啜3個字左右
跟住有時會要poo-poo
我就用2個字刷牙換衫出門口
番到公司3泵
然後一夠鐘走就去搭車番屋企
通常7點前會番到
沖完涼同嵐嵐玩一陣就食飯
我地食飯嵐嵐就坐high chair坐隔離
8點左右開始神情呆滯
仲試過坐坐下訓左添
跟住10點左右再埋身食 (通常訓住食)
半個鐘左右搞掂就一齊訓~
有時3點幾會嘈
然後再訓就訓到6點幾喇

而家嵐嵐4個鐘飲一次奶
一次都飲都200ml
好期待下次去健康院磅重~

岩岩響GMarket買左張playmat
計埋運費都只係$380
嵐嵐響地下玩得好開心呀~


嵐嵐呢期好鐘意食手手
就黎可以成個拳頭塞入口喇


朝早岩岩訓醒既嵐嵐都好開心
要以後都開開心心呀~

B - 疫苗反應

7月28日帶左嵐嵐去健康院打肺炎鏈球菌
健康院比埋退燒藥比我地
打完番到屋企嵐嵐係咁訓覺

9點幾食完奶一路訓訓訓
同佢探熱都係36.9左右
點知到12點幾就醒左喊(平時起碼2點先醒同埋唔會大聲喊)
一摸佢就覺得好㷫
再用探熱針~ 38.1度
wow嚇得我地...
因為佢係咁喊唔舒服訓唔到
我就埋身比佢啜
啜一陣又訓番
但係好快又醒再喊過
咁唯有攬住佢比佢啜抱住佢訓
楊生都有問我比唔比退燒藥佢食
我就選擇到朝早如果都唔退燒既話先食
之後到5點幾啜完就放響我地中間墊高比佢訓
咁就訓到7點幾
起身果陣已經退番落37.2

經過今次之後發現..
1. 埋身真係好好既安撫方法
2. (唔知關唔關事) 人奶可以令BB快啲好番


其實初初楊生都唔想我埋身餵
因為唔知BB食幾多驚佢好快又肚餓
但係試多左之後知道BB係會食得飽
佢就無再反對喇~
最搞笑係半夜嵐嵐要食奶
明明訓之前講話半夜用樽餵
到真係要起身餵既時候問我埋唔埋身餵 XD
我梗係唔會拒絕佢啦
咁起碼佢有得訓
我訓響度餵都有得休息下
雖然我埋身後都會爬起身泵清
係好攰但係都值得 =)
(而家楊生都知道埋身係可以安撫嵐嵐
有時BB喊得勁都會叫我埋身比佢啜下 =P)

前幾日個雪櫃無啦啦唔凍 (好彩唔係冰箱)
因為要雪奶奶所以即刻買過部
仲要買個冰箱夠大既
而家呢個一個冰格櫃桶比我裝滿左冰奶
仲開始侵佔緊另一個
加加埋埋應該有80包以上

嵐嵐開始3.5個鐘先食一次
咁我放工沖完涼就可以埋身餵佢
3.5個鐘我就準備每包170ML既雪奶
雖然有時佢會食淨40-50ML
不過橫掂有淨就唔緊要啦

其實楊生真係好好 (細細聲講話比全世界知)
幫嵐嵐沖涼換片餵奶洗奶樽全部難唔到佢
仲好錫我添~
驚我攰就由得我訓覺自己照顧嵐嵐
望住我半夜埋身抱住嵐嵐又會同我講辛苦晒

有一次楊生同我講佢好擔心嵐嵐唔認得佢
因為朝早番工嵐嵐又未起身
放工番黎佢又訓左
但係而家嵐嵐朝早我埋身餵果陣佢都會醒一陣
見到爸爸都會笑得好開心 =)
唔使擔心佢唔認得你啦

B - 2個月的嵐嵐

唔經唔覺嵐嵐已經2個月大
我地都開始適應有嵐嵐既生活

岩岩番左一星期工
番工前楊生提我買個雪櫃仔放響位
而家真係幾方便
每日番工都要帶冰袋同奶樽
泵同埋配件我就買多左套放公司唔使拎黎拎去

介紹番~
屋企用既優合奶泵好夠力泵得好快
但係頭果幾分鐘會有啲痛
我初初係用medela喇叭 (頭幾下真係超痛)
之後換左用Cimilre喇叭連飛碟就無咁痛
買左Cimilre F1帶番公司用
F1泵得無咁快但係無咁痛
所以2部都有好有唔好

本身我係用medela儲奶樽
但係太貴喇~
之後果啲我就買pigeon
我買左6個pigeon(唔使成日洗嘛)
平時番工就2個8oz medela + 2個3 oz pigeon
咁就夠載我3泵既奶

嵐嵐而家都係每日7餐
不過轉左模式
朝早6點埋身
然後9,12,3,6點就用樽餵雪奶 (每餐150ml)
夜晚訓覺前就埋身
半夜通常都埋身(如果我未泵奶的話)
咁楊生就可以唔使起身餵奶
我又可以一路餵一路休息
不過埋身後我都會泵清~

番工既泵奶schedule
大概就係朝早番到去一次
飯前一次
3點9一次
放工番到屋企沖完涼7點左右一次
半夜3點左右一次 (或者係埋身之後)
每次都泵到200ml左右
咁計下計下每日比完嵐嵐飲都仲有2餐淨
成就左我有超過50包冰奶+10包雪奶
冰奶其實係由12/7先開始儲然後還左增加中..
冰格已經唔夠位
要努力清空埋下面果格先 =p

嵐嵐朝早起身通常心情都好好

我同佢講早晨佢都會笑得好開心

成日都有啲唔同既動作同表情

唔再係成舊飯咁喇~

嵐嵐~

爸爸媽媽好期待你長大呀 >3<

B - 坐月

番到屋企先係繁忙既開始

因為用手擠奶真係好攰
表姐比左個Medela swing泵比我
不過呢隻係單泵
我每次都要泵成個鐘
仲要得果少少

BB由出院果日到第二日都無大便
小便就有橙紅色
BB出世第5日打去健康院問佢就叫我去急症
嚇到我自己坐響度喊 T.T
楊生下午即刻請假同我帶BB去急症室
等左都唔使3個字就有得睇
個醫生話都正常
如果驚既話就住一晚醫院
其實BB係有放屁只係無大便
最後我地決定唔住
同日我地都餵左佢食奶粉
(我地一直都無準備奶粉
呢罐係上次去產檢醫生送的)
隔左陣佢就all左一大蘿便便
原來BB唔夠飽,,

再下一次情緒崩潰係BB 1w1d
由於一直都得好少奶
完全追唔到BB食量
果日星期日我同楊生坐響廳
佢睇住我用手擠奶
我話擠到好攰叫佢幫手
然後就覺得自己點解得咁少奶
跟住一路擠一路喊
楊生見到都嚇親
攬住我話唔好喊啦你咁我心痛架
唔夠咪補奶粉囉
呢次係我第一次見佢喊呀
由結婚到BB出世佢都無喊過
竟然係因為見到我喊所以佢喊~
最後都冷靜左
好彩果陣咁岩啲長老出左去未番黎
雖然我情緒崩潰中既時候老爺奶奶上過黎
但係都比楊生請佢地轉頭先再黎

其實坐月呢段時間都好攰
最灰就係傷口爆線T.T
去左QE檢查
佢幫我清走晒啲軟線就叫我番屋企浸藥再番去覆診
由於佢拆軟線既時候我已經痛到標眼水
最後去左荃灣港安聯番針
呢件事都擾攘左成個幾星期
傷口又痛又唔知幾時好
然後每3個鐘又要起身泵奶
真係身心俱疲 /___||\

其實過多幾日泵奶既奶量已經夠BB食
但係為左佢夜晚訓耐D所以最後果餐都係比奶粉佢食 (聽人講)
唔知點解BB訓覺好多怪聲
又有人話因為奶粉比較燥所以會乾
然後BB半個月就轉番飲人奶
響我係咁飲上奶湯同埋努力泵奶之下
而家每日既奶量夠BB食之餘仲可以儲一餐
雪奶亦都夠BB食3日
(BB而家一餐食150ml每日7餐)

雖然3個鐘泵一次奶真係好攰好攰
好似都未訓得淋就要起身
夜晚遲左起身泵奶就會好內疚
但係見到自己做到全人奶然後BB越黎越肥真係好開心架~

B - 腩B的頭幾日

其實生完聯埋針個傷口已經唔係好痛
第一次生完6個鐘內要落床去廁所
我第一次企有啲頭暈
再過多陣試多次就無事行左去廁所
點知去完之後暈到行唔番出去要拉救命鐘=.=

夜晚9點幾生左腩腩落大房訓左一晚
之後果日既下午5點左右就話私家2人房有位
果度真係大好多囉
仲有私家toilet
人地黎探我地方都寬敞d~

由於BB健康無問題
所以一直都係同我同房訓我隔離張床仔
又因為揀左餵人奶
啲姑娘周不時就黎睇下我
頭兩晚既腩腩都係訓覺多
但係到第三晚我抱住BB餵奶
由夜晚8點到凌晨3點佢都係..
啜->訓->一放落床就醒->再啜->再訓
呢個循環真係搞到我好攰
之後就出左去問姑娘可唔可以幫我睇住先
最後BB就去左隔離有人睇
仲因為佢隔左差唔多成日都無大小便
姑娘餵左10ml奶水比佢
然後大約朝早7點左右BB又番黎我身邊喇

講真餵人奶既頭幾日真係超級攰
BB訓左唔啜就要用手擠
擠完要用針筒儲起比BB食
比BB啜又啜到損晒
不停損左結焦再好番然後又損過
BB又大力啜到好痛
自己又未上奶得果少少..

總之就係咁過左4日3夜住醫院既日子
然後BB同我一齊出院番屋企喇~

楊生每日都黎醫院陪我
然後夜晚就番屋企準備BB出左院之後既野 =)

B - 腩腩出世 (2017-05-28)

本身39w0d見完醫生後
由於40w0d係紅假
要到40w2d先有得再番去覆診
咁都係唯有等啦

到39w4d去左婆婆度食晚飯
飲左4碗冬瓜湯連冬瓜
果晚訓到1:30左右無啦啦醒左
feel到好似有水滲出黎好似失禁咁
我以為自己瀨尿
再等多分幾鐘覺得唔似
因為都控制唔到既
然後叫楊生起身話佢知穿水
佢成個人彈左起身之後好不知所措XD
其實好少水滲下滲下咁姐
唔係瀑布式咁流
佢就拎左條大毛巾比我墊住
由於唔知係唔係真係穿水
我打比媽媽問佢究竟穿水係點呢
然後我地2個坐左梳化等
等左幾分鐘我意識到真係穿左水
每隔一陣個肚硬果陣都會有水滲出黎
咁就CALL的士喇

2點鐘出門口
2點半左右就到左QE
原來凌晨醫院係會有看更會關門架
我地話佢知要去產房
然後就搭LIFT上4樓
我就入左去檢查
楊生要門口等

有大約5-6個助產士黎幫我檢查

檢查既時候我好緊張

成個人震晒

然後confirm我係穿左水

但係宮頸未開

大約3點佢地就send左我上產前房喇

楊生就響房出面等

上到房要check半個鐘bb心跳同埋宮縮

我又唔痛喎

check完就出左去陪楊生一陣

佢買左瑞士卷我食~

之後我又番房等喇

等等等等等到6點有護士黎問我會唔會催生

我話要諗下先

最後8點醫生黎

佢勁大力check完就話宮頸好硬

(佢check果陣真係堅痛)

問我催唔催生

如果而家唔催生既話

到凌晨1點半都未生既話都要催生

咁我就選擇左而家催生喇~

10點左右就種好豆換好衫落產房
我諗都無乜人係好冷靜咁行入產房 XD
楊生響產房門口等
我入去準備左先
我係8號房
產房都算大間
亦都幾舒服

搞掂晒楊生就入埋黎喇
雖然吊住催生藥
但係我一路都3點幾都係無乜反應
2點幾果陣仲可以玩分娩球
只係宮縮既時候有少少痛
醫生每隔1個鐘左右就過黎CHECK
每次都會加大藥量
到4點左右真係痛喇
但係都仲有1度都未開 ><
之後既陣痛都有聞笑氣(個助產士勁recommend)
其實我寧願唔聞
用果個罩聞真係搞到呼吸困難
陣痛唔痛既時候我同楊生都訓著左
然後痛果陣我會meet佢
佢就醒左將笑氣個面罩吸落我塊面
我諗3-5分鐘痛一次啦

一路去到7點都只係開得2度
都有諗過會唔要開刀
其實果陣既感覺係好急便便但係又要忍住唔all
即係我要忍便便+忍痛
最後發現唔使忍便便架
因為係唔會all得出 XD
咁就叠埋心水忍痛
因為真係太痛
我刮傷左目己額頭=.=
亦都唔淨係lin住楊生隻手腕而係周圍meet
例如肚腩 XD

終於到8點9醫生又黎喇
我話我好急可唔可以all
佢話想all就試下all啦
聽到真係超開心
咁就努力試下all左3個字到9點鐘
個助產士就叫我唔好all住幫我準備接生
(其實點唔all呀...)
本身佢叫我將對腳放上個架
但係我啲筋實左太硬mark唔開對腳
咁佢就叫我用手捉實自己大脾
然後向心口拉用力all
我feel到佢剪左下
然後用力all多3下就生左喇
個胎盤都好快就排埋出黎


BB出左世之後
唔知點解助產士無問楊生剪唔剪臍帶
比我地睇左性別之後就拎左BB去檢查
好快抹乾BB後就比我肌膚接觸
腩腩好利害
一出世條頸已經好硬兩頭擰
同一時間助產士就幫我聯針
已經無咩感覺lu (當然佢有打麻醉)
大概半個鐘左右就搞掂
再休息多1個鐘就落番病房喇

辛苦楊生陪左我成日
到我上埋病房媽媽同奶奶幫我安頓好就走lu
BB就由護士拎去沖涼
然後就響我心口訓左成晚(同埋食奶)

終於都等到腩腩出世喇
我地既生活都會有翻天覆地既改變.. =)

B - 第十八十九二十次產檢 (醫院見醫生) (37w0d, 38w0d, 39w0d)

由於每次去醫院做產檢所發生既事都係差唔多
所以都係一次過寫喇~~

第十八次產檢係9/5
呢次係最後一次番工時間去產檢
今次係媽媽陪我去
去到醫院磅重既時候發現輕左0.3KG
驗小便既時候有少少尿蛋白
由於輕左呢0.3KG
比醫生叫左上C2聽半個鐘BB心跳..
仲要留多次小便
唔知係咪因為啲分泌跌左落去

平時睇2點既話2點半就走得
點知今次搞到成3點半
最後同媽媽響醫院餐廳食下午茶就算~~

------------------------------

第十九次產檢係16/5
今次留小便既時候沖完涼先留
響醫院驗既時候即刻無事
約左2點半睇
等埋睇埋唔使3個字就走得
約左yanyee去尖沙咀食LADY M

平日下午都要排隊
等左差唔多3-4個字就有位
唔知係咪企得耐得滯yanyee見頭暈
坐左陣無事就叫野食喇
叫左個earl grey同埋原味千層蛋糕
好食但係都好飽~

行多左陣就搭地鐵番屋企

------------------------------

第二十次產檢係23/5
今次係媽媽陪我去
約左2點半睇等到差唔多3點先有得睇
好快咁睇完之後就去尖沙咀the cheese cake factory
叫左2件cheese cake
2個人食唔晒
好飽~~~

等到39w0d都未比期入院
bb你幾時先出黎呀 T.T
如果你乖乖地自己出黎我就唔使催生喇

------------------------------

講番工人姐姐
黎左差唔多3個星期
做野都幾好
做完晒野就會自己入房
講過既野都記得
亦都幾醒
希望佢可以KEEP住

B - 不再是二人世界

為左準備腩腩出世

我地間細房由書房變左做姐姐房+雜物房

買左3個膠櫃桶

買左張3呎床褥

拆左書枱捐左部desktop搬走左書枱櫈

將high chair 同BB張床褥暫放窗台

由上星期開始倒數姐姐今日黎

每次諗起以後屋企唔再得我同楊生2個人就眼濕濕 ~.~

遲下腩腩出左世就仲忙

雖然話姐姐係黎幫手做野

但係始終而家屋企都唔係話好多野要做

所以我其實係一啲都唔期待姐姐黎..

以前細房夜晚可以抽濕乾衣

尋日SET好左啲野之後放個晾衫架都逼 /___||\

唯有期望我地努力啲搵錢換間大啲既屋啦

仲有希望姐姐乖乖地醒醒定定

B - 第十七次產檢 (醫院見醫生) (36w0d)

今日係腩腩爸生日

老公生日快樂！！

今次醫院都係約左下午2點

自己施施然咁食個魚蛋河之後行去QE

2點準時到

今次我比2星期前重左0.3KG咋

唔通都孕後期體重會穩定番？

血壓同驗小便都無問題

坐響出面等左幾個就叫我名喇

呢次檢查有啲緊張

因為要驗B鏈

9點房係男醫生

10號房係女醫生

因為我次次都係10號房

諗住今次應該係女醫生喇掛

點知就去左9號房..............

上到床除左褲先知原來呢件事係由助產士負責

即係女士 XD

同埋唔使用鴨咀拑

只係用一條好幼又軟軟地既棒去liu左幾下

所以無乜唔舒服

過程都好快

搞掂就叫醫生過黎按下肚啦

BB個頭亦都係響下面

係啦

BB應該好逼郁唔到架喇~

(腩腩由20週照結構開始次次檢查個頭都係響下面)

最後就約一星期後覆診

好想快啲見到腩腩呀 -3-

夜晚楊生比人叫開會(點知最後無開到)

我地就去左青衣城食Mr Steak~

下年生日就有腩腩一齊過喇

B - 第十六次產檢 (35w3d)

又到去見BB既時候喇
今日約左胡醫生11:15
我地10:30就到左
診所一個人都無
咁所以就睇左我地先喇

入到房胡醫生循例問下BB有無郁呀
然後楊生好緊張咁問醫生我個肚成日硬有無問題
醫生都係重覆話唔痛就正常
楊生仲係好似好擔心咁話硬得好密喎 XD
然後都係重覆話正常 ~

胡醫生講過話今次會CHECK盆骨
所以我就入房先
醫生伸隻手指入黎按左幾下就話幾好
應該順產無問題
咁我諗個PAT咁大應該都無問題既 =P

之後叫埋楊生入房睇超聲波
腩腩既大脾骨、肚圍同頭圍都係33-34週
醫生話都係正常範圍
照同陣腩腩個咀仲郁下郁下添~
醫生就話佢咀郁郁即係吞緊羊水
係好健康既動作~
不過BB個頭暫時面向外(即係我個肚)
希望遲啲佢會轉番去向我背脊
但係醫生話到時生果陣push佢都應該可以轉到佢個頭仔
因為我個盆骨夠位 XD
腩腩要乖乖快啲轉身喇~

講晒啲野之後醫生話唔使再黎覆診
叫我去醫院就得
要考慮下使唔使BOOK過2星期去靳醫生度睇下BB轉左頭未..

B - 第十五次產檢 (醫院見醫生) (34w0d)

醫院產檢既頻率隨住預產期將近
越黎越密
今次只係隔左3星期又要番QE喇
同埋係我自己一個去

今次係下午2點
去翠華食左個魚蛋粉之後就慢慢行上QE
由於未夠2點L座未開門
要企門口等.......

大約等到1點10左右就開門登記
登記完量血壓同磅完重驗完小便就等叫名
我係排第一所以好快就到我喇

入到房都係上床聽心跳
個醫生行過黎按肚
就話BB個頭響下面
所有野都正常
跟手講埋下次檢查要做B鏈

由入房到出房成個過程應該都無5分鐘
之後就去約埋下次2星期後番黎喇

B - 第十四次產檢 (32w3d)

等左成6個星期終於都有得再見下腩腩喇 *v*
同上次一樣楊生番左公司之後出番荃灣接我
今次約左胡醫生10:30
我地10:15就到左喇

等到大約10:45就到我地
雖然好期待胡醫生部機有3D
但係其實我都知佢部機無..
所以都係只睇下BB既位置同SIZE正唔正常

醫生話腩腩既頭圍同肚圍都正常
但係大脾骨短左2週
不過佢都話無咩問題既
腩腩而家大約2kg
唔怪得我個肚大左咁多啦 =P


呢張相醫生話係BB塊面
係隻眼同埋個鼻
我地都唔係幾睇得出~~

B - 第十三次產檢 (醫院見醫生) (31w0d)

相隔4星期再次番QE做產檢

今次我媽媽唔得閒
就由奶奶陪我去
(其實啲咁簡單既檢查可以自己去既~)

約左下午2點
Sequence係15
我地就好準時去到
L座1點10先開門比人入去登記

都係例行既量血壓磅重同驗小便
然後就坐低等叫名
我係醫生開工後既第二個
所以2點2就入得去喇

入到去好快手聽完心跳
醫生過黎按下肚
就話BB SIZE正常
無咩問題~
拎埋假紙就出番去

約埋3星期後既期就走得
(我又唔記得帶覆診卡=.=)

時間尚早
同奶奶食完個下午茶就去元朗買餸
去左百佳啲鮮魚檔度買三文魚
個姐姐教每邊煎分半鐘再熄火焗下佢就唔會嚡
果然係得喎
又熟又唔嚡~

***********************
楊生成日都擔心BB唔夠大隻
佢話我又唔係肥左好多
個肚又唔係好大
唔知BB夠唔夠營養
我答佢因為我天生麗質呀~~~ XD
其實佢話我唔係肥左好多我係咪應該開心呢 =P

然後有一日我話第時BB出左世半夜餵奶唔知我會唔會餵到訓著
楊生話︰我陪你喇
(so sweet =P)

再有一日楊生話第時放工番到屋企食完飯沖完涼我就攬住BB架喇
(我都預左你會攬住個女唔放架喇)

B - 胎動 (29w6d)

唔經唔覺腩腩B已經就快30週喇
一直以黎BB都好乖
我都無咩唔舒服
仲行得走得食得訓得
只係到27週左右坐得耐條腰會痛
反而企就無事..

其實響大概22週左右已經感覺到BB郁
只係好輕微
好似個肚震一下咁
但係到依家BB就成日郁
仲會打C EGG添
尋日響屋企睇戲既時候BB郁足成程
BB一定好鐘意睇喇

雖然隔成個月先有得見下BB
但係我地有部胎心機
可以成日聽住BB心跳同埋郁動
呢個應該係我地第一個親子活動喇 =)

楊生每晚都會幫我搽肚肚
一路搽一路講故事
臨訓前又會錫錫BB先訓
希望第時BB一出世就認得爸爸把聲啦

B - 第十二次產檢 (醫院見醫生) (27w0d)

繼尋日見完BB之後
今日輪到去醫院見醫生
之前都係去日間中心果邊睇
今次要行多幾步去L座喇

約左2點半
同媽媽食完個ramen champion先慢慢行過去
而家啲拉麵都唔好食既.......

去到L座登記既時候撞到舅父
媽媽就同舅父傾計
我就自己磅重驗小便量血壓

等左唔夠3個字就叫我入房喇
媽媽掛住傾計無同我入去~
今次係個好後生既男醫生
訓上床然後由姑娘聽左心跳先
然後醫生行過黎按幾下肚咁就收工
順帶一提
我見到張床隔離有部開左既超聲波機架
唔知幾時先會用黎照呢

都唔使5分鐘就行番出房
因為我係第一次黎L座產檢
姑娘叫我入房講多之個流程
3點幾鐘約埋下次就走得lu~

醫院產檢隔4wks
醫生就隔6wks..

B - 第十一次產檢 (26w6d)

等左成個幾月終於可以再見下BB
今日約左胡醫生9:45
楊生番工之後出番黎同我睇

我地9:40去到
登記果陣姑娘就比左一叠媽媽會FORM比我
然後就送左一堆贈品
今次包括埋一罐初生奶粉添~
等左一陣就叫名喇
醫生簡單問左我地照結構既結果
之後就去照超聲波

照既時候BB已經頭向下
仲要面向地下
所以睇唔到樣
BB既頭圍係27w
其他都係26w
醫生話BB有1.1kg

走果陣楊生仲問點解咁快睇完
傻既唔通要好似照結構咁照咁耐咩~~

BB大隻左
成個身已經超出左個超聲波範圍
胡醫生啲超聲波相唔係咁靚
今次係見到BB手指同肋骨

BB而家已經成日郁
有時會搞到我好急殊殊.....
夜晚我訓響度楊生搽肚肚既時候BB就會好興奮
見到BB咁活躍我同楊生都好開心~

禮拜日同埋表姐同表姐夫去左BB展
買左HIP SEAT
又拎左好多贈品
下星期先去佢屋企分貨~

B - 第十次產檢 (醫院見醫生) (24w0d)

事隔一個月再見醫生
應該係最後一次響L座做產檢喇

根據上次既經驗
亦都係因為我媽媽去左旅行
今次產檢我單拖
唔使楊生請假

朝早起身去完殊殊先發現唔記得留..
即刻飲杯水補充番留埋先出門口

約左10:45 sequence係3
朝早楊生煲左2隻蛋
我帶埋包鈣思寶就搭巴士出發
10:30就落車
可以慢慢行過去

去到L座樓下見到勁多人等lift
多人到排到出門口
我就決定行樓梯上4樓
好可惜今時唔同往日
我行到1樓已經喘晒氣
回想起第一次黎見助產士
我一口氣行到上4樓.. T.T
行左唔知幾耐終於到4樓
登記左就去驗vv量血壓同磅重
驗vv同量血壓都正常
由一開始陀B到依家差唔多重左7kg
應該都係正常range

去搵位坐低等叫名既時候撞到舊同事同佢老婆
佢預產期早過我2w
唔知到時會唔會響醫院撞番呢~
佢今次係第一次見醫生
好似我上次咁由9:15等到11:15先有得見醫生
大約11:45就到我喇

入到房都係簡單按肚同埋聽心跳
今次個女醫生好後生
我諗同我差唔多年紀
聽完心跳又唔使約期
拎埋假紙就走得
佢地2個等埋我食lunch
因為佢地係第2胎
好多野都有經驗
一路食一路都傾左好多野
仲同佢老婆交換左電話添~

食完野就番左荃灣媽媽度拎盒蛋卷番屋企食
順便去埋南豐Kinetics拎贈品
係3樽仔既試用裝BB沐浴露~

之後就番屋企lu~

楊生奇怪點解隔咁耐都無得見BB
其實都孕中期超聲波唔使照咁密
下次去見私家係呢個月尾~

B - 感冒了 (22w2d)

經過上星期既作感冒徵狀
3日前終於都要發了
開始流鼻水鼻塞有痰呼吸不順
最後第二日就請左病假

去左門診睇醫生
為左排到得17個位既公務員籌早左9個字到
最後我排第一 =v=
醫生仲寫左2日假紙比我
雖然佢開左啲孕婦食得既藥
但係我見無乜野都無食
(奶奶因此好緊張..)
媽媽陪我睇完醫生就去食野買埋花先番屋企

下晝無訓覺
攤左響梳化睇戲
好難先hea到楊生番屋企
我就食埋朝早煲既粥~

到尋日仍然請左病假
不過情況比之前一日好
得閒吸塵同抺下屋企
下晝訓左陣等埋楊生放工就一齊番婆婆度做節~

雖然感冒未清晒
但係都好得七七八八了
呢2日唔使番工bb都郁得好勁
係咪見媽媽攤響度太舒服呢~?

B - 第九次產檢 (醫院照結構) (21w4d)

今日係去QE照結構
約左9點鐘
Sequence no係2
我地好準時咁去到E座1樓比錢
個會計部岩岩先開門

然後上番去B座3樓
我地係第一輪做檢查
等左一陣9點3姑娘就叫左入房

因為岩岩開門既關係
啲冷氣好凍
姑娘亦都要整呢樣整果樣
過左5分鐘就上床開始檢查喇

初初姑娘係咁郁
我地乜都睇唔到..
然後佢話BB手左響度
頭向下
所以照唔到塊面
仲同BB講照唔晒唔比走

姑娘好細心咁照
由BB個頭
有無腦積水呀小腦呀
到心臟啦腎啦脊骨啦
手指腳指咁
一路照一路講解
仲問我地私家果邊係咪照到性別
佢再睇多次都應該係女仔
再過多陣BB擰番轉正面
姑娘就可以睇晒喇
最後姑娘話胎盤位置正常
咁可能呢個星期佢升番上去 =P

呢個姑娘真係好細心
有一秒我覺得上次去私家照結構好似浪費左
不過楊生話都係照清楚啲安心啲姐~~

見BB咁乖
我地照完就去左AIA玩
仲帶左幾個公仔番屋企

B - 第八次產檢 (私家照結構) (20w1d)

到左20週
BB今日就去私家照結構喇
本身QE都有offer比我
但係有人話公立醫院照得無咁好
所以就自己去私家照左先

十一月果陣開始搵
初初上網見到王紹宏醫生既評語幾好
就book佢今日
王醫生照結構$2,900
然後再search下
見到羅宇帆醫生啲comment都唔錯
而且只係$2,000
又咁岩book到同一日
所以就決定左睇羅醫生

今日照結構除左楊生之外
邀請埋我媽媽一齊參與

同楊生去紅磡食lunch
行左陣黃埔就搭地鐵去尖沙咀
約左羅醫生3:30pm
點知診所3:00打黎話可以早啲
但係我地果陣同媽媽食緊下午茶
匆匆忙忙食完就過診所

去到診所等左半個鐘左右就到我地喇
臨出發前都叫bb要乖乖地比醫生check~
可能今次照結構比較耐
姑娘差唔多唧左半支jel..
啲jel仲係暖架~~
羅醫生好nice
一放個探頭落肚就同bb講野
睇bb頭部既時候仲開左3d比我地睇添
好搞笑呀bb遮住隻耳仔


佢好細心咁逐個位睇
bb好乖咁比醫生睇到啲器官
醫生仲話bb好斯文~~ XD
然後又睇多一次大脾喇 --> 女仔！
睇埋心臟呀腎呀胃呀
一直都無問題
點知照完bb既時候
醫生話胎盤有啲低...
如果要過幾個星期都係咁就係胎盤前置
唔可以順產要開刀
不過又話通常到後期都會升番上去
要keep check住
下次去醫院都要話比醫生知

比錢既時候姑娘比番10張超聲波相比我
仲好sweet咁寫埋係咩部位
然後仲有1隻dvd比我地番屋企睇


番到屋企到上網睇下胎盤低既資料
最主要都係唔要踎低
亦都唔好拎重野
好多時之後胎盤都會去番正常位置~
我要留意番!

下星期六到去QE照結構
睇下到時佢照唔照到同樣問題先~